La ciutat màgica
Retrospectiva
Es git es paar Zeichä wo druf hidüted, dass es Ziit isch hei z’gah. Seg das ufärä Weltreis, imene Sprachufenthalt oder imene Ustuschsemester. Ich heti easy no chönne zwei wiiteri Mönät in Barcelona verbringe, aber d’Tatsach, dass mini Migros-Vitamintablette usgange sind, mis Bialetti-Kafichänneli am 13. Dezember quasi id Luft gfloge isch und s’Wetter au immer Schwiizerischer wird sind gnueg Gründ gsi zum am 23. Dezember hei z’gah.
600km a Andalusia - S’magischä Drüüegg
Min letschtä Artikel hani churz nach minere Rückkehr vomene fantastische Wuchenend in Andalusiä ueglade. Andalusiä isch die südlichscht Region vo Spania und weltwiit bekannt für Flamenco. De Magnus, en Kolleg vo Norwegä, und ich hend die geniali Idee gha, es Weekend im Süde z’verbringe, bevor die intensiv Prüefigs-Lernphasä afangt. S’folgendä bruchts für e unvergesslichi Ziit im Olivä-Mekka vo Spanie: An billigä Flug nach Malaga, es funktionierends Auto wo 600km schafft (i euisem Fall en Peugeot 308), en halbe Tag für de Caminito del Rey, en ganze Tag für Cordoba, en wiiterä für Granada und en Abig für Malaga. De Trip isch de absoluti Hammer gsi, da mir beidi Sightseeing gliich definiered, gliich Auto fahred und beidi nie so recht drus cho sind, wie schnell mer eigentlich dörf fahrä. Es riise Chaos mit de Verkehrsschilder i dem Teil vo Spanie. Zu gueter Letscht, de Magnus isch en super Fotograf. Richtig, d’Bilder ide Galerie sind vo sinere Linse. Ich hoffä, dass Ihr d’Reisebeschriibig de Fotenä entlang gnüssed. Ufem Magnus sinere Websitä giits no wiiteri atemberaubendi Bilder vo ihm.
30 ECTS en 99 dies - Limbo tanzä
Zrugg vo Andalusiä hani müesse vom Touri- in Studäntä-Modus wächslä. Das isch bsundrigs schwierig gsi, willi d’Modul ja nur han müesse bestah. D’Tatsach, dass mini Notä nöd i mis Bachelor-Zügnis übertreit werded, bedüted, dass jede Punkt über de Bestandä-Punktzahl verschwändeti Freiziit isch. Je nach Fach hät d’Modulendprüefig zwüsched 30% und 45% vode Modulnotä usgmacht. Dank mine Vornotä, woni während em Semester gsammlet han, bini mitemä rechtä Polster ad Prüefigä. I jedem Modul hani nur müesse d’Minimumnotä 4/10 holä. Aber wieviel Lernä bruchts für 4/10? Ich han also chli Limbo tanzt. In International Economics hani de Prüefigsruum zwar mitemä mulmigä Buchgfühl verla. Zweidrittäl vo de Prüefig sind Richtig/Falsch-Ufgabä gsi. Mer het jewiils müessä sägä ob e Ussag richtig oder falsch isch. Falls falsch het mer d’Ussag so müessä korrigiere, dass sie gstummä hät. Das isch drum e Useforderig gsi, will euisi Dozentin de Englischä Sprach nöd wückli gwachse isch. Wückli i jederä Ussag hets gnueg Ruum für Interpretation gä, drum hani denn eifach überall en chline Kommentar anegfätzt. Wunderbar, dassi all Fächer bestande han (gseht ganz so us, als obi Freiziit verschwändet han :) ). Zämä mitem Spanischkurs hani total 30 ECTS gsammlät in Barcelona. Ich muen zuegä: Ällei wege dem hät sich s’Uslandsemester glohnt. Ich chan ohni Stress d’Wiehnachtsziit und de ganz Januar gnüssä, während mini Kollegä ade Fachhochschuel am Liidä sind. A därä Stell en Gruess an Wettach, Nick, Diego und Kosta. Aber ja, Ihr hettäd ja au chönnä in Ustuusch ga :)
Torna a Suïssa - Was chunnt als Nägschts?
Nach de Prüefigä hani no wiiteri 11 Täg gha zum Barcelona gnüssä. Es isch super gsi zum chli chillts Sightseeing machä, d’Nacht duretanzä oder eifach nur vo Cafi zu Cafi hüpfä mit de neuiä Kollegä. Am 23. Dezember hani denn BCN verla und bin zrugg uf Züri greist. Richtig, diä viär Mönät hend sich agfühlt wie 6 intensivi Wuchä. Am 3. Januar hani wieder agfangä schaffä. Aber das bedüted nöd, dass rodamón mag jetzt vom Erdbodä verschwindät. Ich wird im Februar chli dur Kolumbiä paraglidä. Ich versicherä eui, dass es gnueg Gschichtä zum brichtä und Fotänä zum zeigä giit.
Für de Momänt bliibt mer nüt anders übrig als eui DANKÄ z’sägä. Dankä a all Leser und Fründe, dass Ihr da sind. Es isch es echts Privileg vo eui umgä z’si.
Es guets Nois.
Us Züri grüesst,
Chris
Galería
Palabras y anécdotas
D’Kategorie «Palabras y anécdotas» odär in Schwiizerdütsch «Wörter und Anekdotä» bringt eui es paar Wörter in Spanisch zum euiä Wortschatz vergrösserä, verknüpft mit Anekdotä us mim Alltag in Kataloniä.
quedarse dormido = verschlafä
D’Liza känned Ihr ja bereits usem rodamón mag #2. Irgendwenn im November hemer euis amene Fritigabig troffä zum bi Tapas euis Gegesiitig uf de neuisti Stand z’bringä. Mir hend euis einiges z’brichtä gha. Mir hend de Abig also nöd mit Tapas abgschlossä, sondern sind unbewusst vo Bar zu Bar ghüpft. Es isch jewiils die anderi Person gsi wo motiviert het „chum, mir nämed no eis“. Jetzt dänksch sicher „Barcelona, na und?“. Richtig. D’Liza hät am nächschtä Morgä müessä am 4ii 30 ufstah zum ihre Flug id Schwiiz verwütschä. Mini Wenigkeit het am 6ii 30 usem Bett müessä, willi mi füren Tagesusflug is katalonischä Hochland agmoldä han. Es ischs erst mal i mim Läbä gsi, dassi so richtig verschlafä han. Zersch häts mi so richtig ufgregt, dassi verpennt han. Denn hani aber s’beschtä usem Tag gmacht und han e wiiteri Sach vo minerä To-Do-Lischtä in Agriff gno (en Usflug uf de Tibidabo aka Barcelona’s Huusbärg, lueg s’Foti rächts). D’Gschicht isch allerdings nonig verbii: Woni de Liza am Mäntigabig aglüte han und gfrögt han wie ihres Weekend gsi isch, häts mi abem Stuehl ghauä. Sie hät au verschlafä und ihre Flug verpasst. Dank ihrärä Hartnäckigkeit und de Buechig vomänä wiiterä Flug het sie’s denn glich no nach Helvetiä gschafft und am Poltärabig vo ihrärä Schwöschter chönnä teilnä. „Nämemer no eis?“.